ഏറെ പറഞ്ഞ്
പിന്നെയും പറഞ്ഞ്
ഞാന്‍ മടുത്തു തുടങ്ങിയിരിക്കുന്നു,
ശരി,
( ഓ, ആ മുഖം നേരെ വയ്ക്ക്
എനിക്ക് നിങ്ങളുടെ ഭാവം തീരെ ഇഷ്ടപ്പെടുന്നില്ല )
ഞാന്‍ ഒരിക്കല്‍ കൂടി പറയാം
ആകസ്മികം ആയ ഒരു ധനക്കമ്മിയുടെ ആഘാതത്തില്‍
വഴി മറന്നു പോയതല്ല
എന്റെ വീടിന്റെ വാതിലുകളും ജനലുകളും
( നിങ്ങളുടെ ഭാവത്തിന്റെ കാര്യം മറക്കണ്ട..)
മറിച്ച്,
അനിവാര്യമായൊരു പുതിയ വിപ്ലവത്തിന്റെ കുഴലൂത്ത്കാരായി
സ്വയം അപ്രത്യക്ഷരായവര്‍ ആണവര്‍
( നിങ്ങളുടെ മുഖം.......)
അല്ലെങ്കില്‍ നിങ്ങള്‍ ആലോചിച്ചു നോക്കൂ
വാതിലില്ലായ്മയുടെ ഗുണങ്ങള്‍
സന്ദര്‍ശന നെറികേടുകളുടെ മുഖത്തേക്ക്
വലിയ ശബ്ദത്തില്‍ വാതിലടയ്ക്കേണ്ടതില്ല...,
പിന്നെ,
അറിയിക്കാതെ വന്ന പ്രിയപ്പെട്ട ഒരാള്‍
അടഞ്ഞ വാതിലിനപ്പുറം മടങ്ങിപ്പോവില്ല...,
ഒന്നും ഇല്ലെങ്കിലും,
ഇല്ലാത്ത വാതിലിന്റെ വിടവില്‍
സ്നേഹം കൊണ്ട് കാണാത്ത കോട്ട കെട്ടുന്ന ചിലരെ
നിങ്ങള്‍ക്ക് കാണിച്ചു തരാന്‍ എനിക്ക് കഴിഞ്ഞേക്കും
അപ്പോള്‍
വാതിലുകള്‍ ഇല്ലാത്ത ഒരു പുതിയ ലോകത്തിനു എന്റെ അഭിവാദ്യങ്ങള്‍ ..!!
No comments:
Post a Comment